Turmush — «Мекендештер» рубрикасынын кезектеги каарманы — 25 жаштагы Айжаңыл Заирдин кызы. Ал учурда Германиянын Гюнцбург шаарында үй-бүлөсү менен жашап жатат.
Каарманыбыз 2001-жылы Ош облусунун Ноокат районуна караштуу Бел айылында төрөлгөн. Г.Эргешов мектебинде билим алып, аны аяктагандан кийин Ош мамлекеттик университетинин искусство факультетинин кийим дизайны бөлүмүнө тапшырган. Бирок окуусун бүтө элек.
«Германияга 2022-жылы жолдошум экөөбүз баш кошуп, «Ausbildung» программасы аркылуу келгенбиз. Чет өлкөдө жашаганда биринчи кыйынчылык — тил маселеси. Тил билбесе жакшы жумушта иштөө кыйын. Анан Германияда документ иштери көп. Үй-бүлө алыста, сагынуу болот. Өзүңдүн туулуп-өскөн жериңди сагынасың. Көпчүлүк эле Германияда айлык акы жогору, тез эле байып кетүүгө болот деп ойлошот. Бирок Германияда ижарага алынган үй да, тамак-аш да өтө эле кымбат. Ошондой эле документ иштери көп жана кыйын», - деди ал.
Айжаңыл Заирдин кызы Кыргызстанда да, Германияда да жарандар табиятты жакшы көрөрүн айтып, өзгөчө майрамдар тууралуу айтып берди.
«Кыргызстанда да, Германияда да табиятты аябай жакшы көрүшөт. Германияда көпчүлүгү токойго сейилдеп, велосипед тебүүнү жактырышат. Ал эми Кыргызстанда тоого, жайлоого барууну жактырабыз. Анан эки өлкөдө дагы улуттук салттар бар. Кыргыздарда той берүүнү жактырып, Нооруз майрамы өзгөчө өткөрүлөт. Ал эми немистерде Oktoberfest (сыра фестивалы), Weihnachten (Рождество майрамы) майрамдарында өзгөчө базарлар уюштурулат», - деди ал.
Анын айтымында, Германияга жаңы барган учурда ыйлаган күндөрү болгон. Ал тамак-аш жана ресторан тармагындагы кесипттик даярдоо боюнча 1-курсту бүтүп, 3 жылга декреттик өргүүгө чыккан.
«Германияда жолдон адашуу көп болгон. Окууга 1 сааттык поезд менен барчумун. Ар дайым өтүп кетем же эрте аялдамадан түшүп калып, ыйлаган күндөр болгон. Мен жашаган жерден окуган жеримдин аралыгы 1,5 саат болчу. Кышында таңкы 6да караңгы убакта адашып, туура эмес автобуска түшүп алып, башка шаарга кетип калгам. Ал убакта тилди жакшы билбей, айдоочудан түшүп калууну сурана албай, акыркы аялдамадан түшүп, окууга 2 саат кечигип баргам», - деп эсерди.
Айжаңыл Германияда убакытка так болуу маанилүү экенин белгиледи.
«Германияда эл кичи пейил, жаман көрөбү, жакшы көрөбү, күлүп сүйлөйт. Убакытка өтө так келишет, кайсыл жерге барба алдын ала жазылуу керек. Болбосо кабыл албайт. Табияты кооз жана таптаза. Бул жакта бардык жерлер мамлекетке карайт, жеке адамдыкы деген жок. Унааны туш келди жерге токтотууга болбойт, жана ар бир жерде терминал болот. Унааны токтотуу үчүн сөзсүз акча төлөнөт. Жекшемби күнү — дем алыш күнү дүкөндөр иштебейт. Бул күн үй-бүлөлүк күн болуп эсептелет. Ишемби күнү маркеттер кечки саат 20:00гө чейин гана иштейт. 24 саат иштеген маркеттер жок, кичине автомат терминалдар гана бар.
Германияда балдар үчүн шарттар өтө сонун. Балдар 10 айынан бакчага барышат. Менин балам 1 жашында барган, азыр тили немисче чыгып жатат. Балам 2 жашта, учурда декреттик өргүүдөмүн. Германияда өргүү 3 жылга берилет. Буюрса бул жакта окуп, медайым (Pflegefachfrau) болгум келет. Акыркы убактарда кызыгып жүрөм», - деди ал.