Turmush — Turmush чет өлкөдө жашап, иштеп же окуп жүргөн кыргызстандыктар тууралуу баяндарын улантат. Бул жолку «Мекендештер» рубрикасынын каарманы — Талас облусунун 30 жаштагы тургуну Мээрим Эшкожоева.
Мээрим жолдошу менен учурда Түштүк Кореяда, курорттук Сокчо шаарында жашап, иштеп жатат. Экөө тең мейманканага жумушка орношкон. Анын айтымында, Сокчо тынч атмосферасы, таза абасы жана деңиз менен тоонун айкалышы менен айырмаланат.
Билими боюнча Мээрим англис тили мугалими. Бирок адистиги боюнча иштеп кетүү мүмкүн болбой калган. Келечекте ал окуусун улантып, Кыргызстанга кайткандан кийин мугалим кесибинде өзүн сынап көрүүнү пландап жатат.
Үйлөнгөндөн кийин жубайлар Москвага иштегени барып, ал жакта 3 жыл жашашкан. Көп эмгектенип, бир бөлмөлүү батир сатып алууга жетишкен. Андан соң Бишкекке кайтып келишкен, бирок ошол учурда жаңы этапты кантип түзүүнү толук түшүнө алышкан эмес.
Түштүк Кореяга болгон кызыгуусу мектеп кезинде эле пайда болгон. Ал «Цветочки после ягодок» дорамасын көргөндөн кийин корей маданиятына кызыга баштаган. Кийин 19–20 жашында корей ашканасы бар ресторанда иштеп, корей тематикасы ага жакын бойдон калган.
2025-жылдын февраль айында Кореяда 10 жылдан ашык жашаган бөлөсү жубайларга көчүп келүүнү сунуштаган. Жолдошу макул болуп, 2025-жылдын 23-мартында жубайлар Кореяга учуп келишкен.
Корея Мээримге алгачкы күндөн тарта жаккан. Биринчи таасирлеринин ичинде ал адамдардын сылык мамилесин, тазалыкты, тартипти жана шаардык чөйрөнүн ыңгайлуулугун белгилейт. Күнүмдүк турмуштагы көп нерселер, анын ичинде “акылдуу” технологиялар да, ал үчүн жаңы тажрыйба болгон.
Ал ошондой эле эрежелер катуу жана айып пулдар көп экенин айтат: алкоголду көп колдонушканына карабай, анын байкоосунда коомдук жаңжалдар жана тартипсиздиктер сейрек кездешет.
Мээримдин айтымында, Корея менен Кыргызстандын айырмасы өзгөчө коопсуздук маселесинде байкалат. Көчөдө табылган буюмдарды көп учурда полицияга же атайын пункттарга тапшырышат, ал эми камералар дээрлик бардык жерде орнотулган.
Азыр жубайлар иштеп, кеңири үйгө акча топтоп жатышат — азыркы батири алардын баамында өтө эле кичине. Ошол эле учурда убакыт таап, саякаттап, жаңы таасирлерди алууга аракет кылышат.
Үнөмдөөгө жумуштагы шарттар жардам берет: мейманкана турак жай жана тамак-аш (түшкү жана кечки тамак) менен камсыз кылат. Ошондуктан күнүмдүк чыгымдар минималдуу. Антсе да алар үйдөн кыргыздын көнүмүш тамактарын жасап жешет.
Мээрим алгачкы убакта эң чоң кыйынчылык тил болгонун жашырбайт. Мындан тышкары, жумуштун физикалык жагы да жеңил эмес болуп чыккан.
Көчүп келерден мурун Мээрим сулуулук салонунда иштеген. Ошондуктан мейманканада (горничная) иштөө ал үчүн жаңы тажрыйба болгон. Бирок кыздын айтымында, жетекчилик жагынан жолдору болуптур: тил тоскоолдугуна карабай, аларга түшүнүү менен мамиле кылышат.
Мээримдин айтымында, кыргызстандыктар көбүнчө Каннын жана Инчхон шаарларында көп. Сокчодо кыргыздар аз болгондуктан, көбүнчө кесиптештер — кыргыздар жана казактар менен аралашат.
Ал көпчүлүк 10–12 саат иштей турганын, ал эми корейлер эмгекчилдиги, тартиптүүлүгү жана сырткы келбетке көңүл бурганы менен айырмаланарын айтат. Ошол эле учурда айрым үй-бүлөлүк салттар, анын байкоосунда, кыргыз салттарына окшошуп кетет, анын ичинде кайын эне менен келиндин мамилеси да бар.
Бош убакта Мээрим жолдошу менен Кореяны кыдырып саякаттаганды жакшы көрүшөт, кээде Сеулга да барып турушат — автобус менен жол 3,5 сааттай убакыт алат. Мындай сапарлар арзан эмес болгондуктан, жубайлар аларды сейрек пландаганга аракет кылышат.
Жакында Мээрим UGC-контент менен алектене баштаган: Кореядагы жашоо, баалар жана турмуш тууралуу видеолорду тартып, өлкөнү жазылуучуларына көрсөтүп жүрөт. Кореялык бир нече косметикалык бренддер ага PR-бокстарды жөнөтүп да үлгүрүшкөн, бул багытты өнүктүрүүгө кошумча мотивация берген.
Келечекте жубайлар Бишкекке кайтып келип, ата-эне болуп, жашоосун мекенинде улантууну пландап жатат. Алар ата-эне болуу темасына аң-сезимдүү мамиле кыларын, адегенде материалдык базасын бекемдеп, айрыкча турак жай маселесин чечип алууну каалашарын айтышат.